أيه مرة لدرجة أني أقدر أفعصك بأصابعي ، حسبي الله عليك سبع التحاسيب أنت ولغتك الي سببت لي عاهة مستديمة بالقلب .

هههههههههههههههههههههههههههههههههه أبو أزمات .
ياربيه ضحكت ضحك مدري وراه هههههههههههههههه ، تذكرت الأيام الخوالي ،
على إني مقفلة الأكاونت ، لكني فعلا أقدّر إنك وبالرغم من كل هذا أرسلت لي ، ومير توي أفطن إني مخليته مفتوح .

بخصوص أسئلتك ، أنا الحمد لله بخير وعافية وأزقح ، الأخبار عندك ياخوك .
وتراك جاي بوقت زنقة مهوب أزمة ، بس منيب قايلة وش .

وع ، ليه الفورم تعوق عقبي ؟ .
أعتذر على التأخر بالرد .

يلا ياحلوين .. ماودي أكتب معلقة طويلة عريضة سوات هذيك المرة , لكن فعلًا ما أقدر أقول إلا أشوفكم على خير كل أبوكم ,
أدعولي كل ماذكرتوني لكن لاتدورون علي , لآني ما أضمن لكم تواجدي ، الدنيا تغيرت ، والعمر الي عشته بالفورم كان تقريبًا سنة ونص , ومن سنة ونص لين الحين تغيرت أشياء كثيرة , بدون تعداد , لكن يكفي إن الأفكار تغيرت والي كان له أهمية بالماضي صار شيء مُكمّل بالحاضر .

حللوني . على كل شيء .. أنا أدري فيه ناس متضايقة مني لأنهم يجوني دايم وأنا ما أجيهم , ولأني ادري إنهم يبوني اجي ودايمًا أسمع كلمة " إذا ماجيت ماتجين " , لكني أعتذر وتأكدوا هالشيء بدون قصد .

ورجاء ، لا تحاولون فيني أفتح الفورم مرة ثانية , لآني أكثر من مرة أفتح وأقفل عشانكم , ما أقول هالشيء منة , لكنه شيء يعور قلبي لما أدري إن أحد مشتاق لي وأنا مشغولة عنه ولا أقدر اجلس معه مثل ماهو يبي وأنا ما أحب أتسبب بضيقة إنسان .


وبتجمعنا الجنة بحول الله وقوته ق1 ,
الي يبي يقول شيء يقوله , لآني بقفله اليوم الليل إن شاء الله , لكن عندي شرط قبل مايرسل , إذا كان الكلام كلام عتب أفضل إنه مايرسله .

شكرًا على كل لحظة حلوة مرت علي وأنا هنا بسببكم ق1 .

أولاً أنا إنسانة من سمعت إنه عيد باتسر متسعت شعري بأكبر لفافتين بالبيت حتى من قو الحماس بغيت أفك روس أهلي وأحطهن , ورايحتن بنعال البيت الوردية حتى الشبشب أكبر مني خخ ، عاد قسم بالله شكلي خلفة بالعباة وهالخلقة وكل الجبال الي درستها بالجغرف غدت فوق راسي ، ومن زين الأخلاق نزلت للسوق مضطرة بهالخلقة ولا بعد رايحتن أشتري تورتة بهالشكل لي وجه مير .

بس ماعليه , انا كشخت ونزلت سلمت على أمة الصمد تحت همين طلعت وسحبت عليهم ورقيت فوق وعطيتهم ركبة وكل لفظة تمت للجحدة بصلة سويتها فيهم , وأمي تهزئني أدخلي قلت منيب , الله وأكبر كل سنة نفس الوجيه ونفس السوالف فرق شيء ؟ ما اعرف اتصنع اني خاشة جو معهم =/ ,

وغازلني اخوي الصغير شوي يالبى هالإنسان خخ , واليوم كل لبسي أبيض كني جبيرة , حتى خالاتي أستغربوا إني لابسته , وأكتشفت إنهم كانوا يلقبوني بـ " غدير أموات " خخخ ,

وبس . " خشة سولفت وتحسفت تحذف " ؛

كل عام وأنتِ بصحة وسلامة وكل أبو دايم صديقتي مهوب كل عيد ,
وكل عام وانتم بخير يالي تقرون لي ,
ودي أسلم عليكم واحد واحد بس ماش الوقت مايسعفني والله ,

ومير برب بحط على خدي ثلج > طراه سلام باتسر ,

ههههههههههههههههههههههههههههههههههههههههههههههععععههههههههههههههههه ,
تصدقين وش أكثر شيء اتمناه ؟ هذيك اللحظة , ألي كل من تحداني بشيء وسويته وحققته لنفسي ودي أشوف وجهه , ودي تجي هذيك اللحظة الي أحط عيني بعينه وأكبر أبتسامة سخرية مرسومة على فمي وهو يكسر نظرة عينه ويناظر للأرض ، أبن اللذينا كسّر مجاديف أوادم ودارت الدنيا وكسرت عينه ,
أصبري خقيت قسم بالله على هالخيال > سحبت عليتس .

ههههههههههههههههههههههههههههه بنت اللذينا تجرجريني بالحتسي عشان تشوفين مدى توافقي أنا وأخوتس ؟
أبوتس وش هالدعوة , > راحت تبلغ الهيئة

لو السالفة على كثر التهذري تسان ليه ندعي ؟ ليه نحلم بالأشياء ؟
الأمل بالله كبير وأنا أخيتس , وخلتس عن تكسير المجاديف ,
تشوفين مير إن مامريت بطيارتي الخاصة على حايل وأجدع عليتس العملة الي بأسمي وأحطتس بالقائمة السوداء في دولتي الجديدة ونهاية الحلقة أطلع لساني لتس وأروح وأخليتس بهالديرة ض1
> كنتس فليتيها على هالحلوم ,

هههههههههههههههههههههههههههههههههههههههههههه اصدمك واقول إني ماعمري عتبت برا السعودية
وأبشرتس على إني بلغت عتيا إلا إني للحين ماعندي جواز سفر , وأخاف أقولهم أبي جواز يقولون مع رجلتس , ياذا الرجل قسم الوكاد بدخل عليه بالشوفة بالنعلة وبقوله " مابغيتا " =/ ,

لكن شوفي عمومًا بسفراتي الداخلية أفقد غرفتي ,
أفقد الروتين وأجواء البيت إلى حد ما , الواحد مايرتاح إلا ببيته .
وماهقيت بيوحشني شيء لاطلعت برا , الحمد لله منيب راعية فقايد ,

ورديت عليك ماوصلك ؟ ياليل أبو بعارين > راحت تكسر المودم

تعرفين وشلون تجيبيني على وجهي يابنت الإيه ض1 ،

ياخيه تسأليني أنا عن حقوق المواطن ؟ أبوتس بذا الديرة مافيه ناس عايشة حياة طبيعية عشان تقولين حق مواطن , خل نعيش بالبداية حياة سوية ، مافيها عادات , مافيها كلمة لاسويتِ كذا وش بيقولون الناس , تقل هالحين الناس ماقالوا شيء للحين ، خل نحس إننا نعيش ونحس إن الحياة سهلة همن أفكر أنا وش ناقصني كحق من مواطنتي , كل شيء نسوية نسوية بعين المجهر ، كل أبو شيء محسوب علينا عكس حتى لو كنا نبيه ونحبه نعافه غصب من علينا , كل شيء يجيب المر أستغفر الله يارب لاتسخط علينا بس , كل ماقلتِ لأمي شيء قالت وش تسوين طيب الحياة ماتجي على الكيف , هذا البلا .. هذا الي خربنا ، أغلب الأشياء تجي على الكيف لكن حنا مانقوى نسويها ، أبي نرتقي لدرجة إننا نحترم أشياء كثيرة , حنا شعب تعود على السخرية من كلش , حتى على نفسه , كلش نسخر منه لآننا ماتعودنا نتقبله , ياشيخة كل ماقلت تعدلنا أكتشفت إننا أسوأ من قبل .

أبي أهاجر .. والله أبي أهاجر .. أنا من حيني هذا حلمي وهالفترة إستفحلت الحالة بزود ،
شفتِ قريح وبزنة ؟ ودي أروح له ، المهم أهاجر .
أنا شطحت واجد لكن الشيء بالشيء يُذكر .
وإن رحت في خرايط أمها بأعلمهم أنك الي مرسلة هالسؤال وأطلب لي وياتس زنزانة وحدة .

أحسك تقطعتا وأنت تعصر مخك على هالسؤال ,
إيه يابابا الظاهر أن الكون مسكون إن ماكان بالأوادم بيكون بالجن ,
> وتجيبين طاريهم عادي كنهم خوياتس ؟

هههههههههههههههههههههههههههههههههههههههههههههه
تصدقين قسم بالله أول ماشفتس مرسلة هالرسالة الإفرنجية حسبتس الأسك مي , همين يوم شفت صورتس قلت يمكنها غلطت وأرسلته للفلورز حقينها , أبوتس عجزت أصدق أنتس جاية وترطنين إنقلش , كل ذا من الماستر ؟

وحااااااااام قسم بالله لتس وحشة كبر خشمي , وتراي كتبت لك كلام أول مافتحته بس الظاهر إنه ماوصلتس ,
ياربيه وقسم وحشتينن يالشينة =( , والله مدري وش أقول أحس تعبت من كثر ما أغازلتس ومابقى فيني حستي أقوله =( ،
وأبوتس مارجعت رجعت بس فتحته عشان أشوف أخباركم وتشوفون أخباري , يمكن أقفله ترا عقب العيد , ويمكن ما أقفله لاجت ذيك الحزة أستخرت , لا جد تبونن أقفله قفلته ماتبون منب مقفلته , وش قمت أخنبدز مير ؟

كوه بس Hug Hug Hug Hug ,
" خشة كسرت ضلوعتس"

دوتس أنتِ وغيرتس الي أنبرش في الإنبوكس ض1 ,

هذي الأصلية , وصورتي مضبطتها حبتين بالفوتو ,
http://i51.tinypic.com/not4za.jpg

ههههههههههههههههههههههههههههههههههههههههههههههههههههههههههههههههههههههههههههه
ههههههههههههههههههههههههههههههههههههههههههههههههههههههههههههههههههههههههههههه
الله يرجتس هههههههههههههههههههههههههههههههههههههههههههههههههههههه
والله غشي علي على هالرسايل إلي أرسلتيهن ,
اهم شيء إنتس تهوشين علي تحت وتقولين دفشة همن بقدرة قادر صرتِ أنتِ الي تهوشين عليهم بسم الله عظايم الأسم خخ
هههههههههههههههههههههههههههههههههههههههههه جازت لي سالفة حديقة الألوان و بنت عمك خضرا خخخخخخخخخخخخ ,
مهوب سالفة إمعة ولا لأ بس يختي الشيء الي يجوز لي أنا خلاص أشريه وش دخلني قديم ولا مهوب قديم , بس عاد مهوب أحط ديرمة من عهد جدتي وأقول جازت لي أبرك من الروج خخ ,
لا الواحد يوازن حبتين ،

ياربيه من عطلت ماغشي علي زي تسذا الظاهر ههههههههههههههههههههههههههههههه ,
لاجد وراي قمت أمصخر الي يسوى والي مايسوى من تالي ؟

سلمي على أميمتس , والله يشرح خاطرتس والله إني كسبت في نفسي حسنة يوم فتحت الفورم خخ

أصبري بأنبرش بذا السؤال عجزت أتحمل ،
ههههههههههههههههههههههههههههههههههههههههععععهههههههههههههههههههه
ضحكتك هههههههههههههههههههههههههههههههههههههههههههههههههه
مهوب دفاشة بس والله سخافة قسم المرأة بزود ، يركزون على أشياء مالها داعي ,
أجل ذاك اليوم دخلت موضوع كامل سالفته عن وشلون تمسكين الشنطة ؟ وإن لكل ستايل مسكة خاصة ؟ وياويلتس ياسواد ليلتس وبيجيتس العوعو لو مسكتِ الشنطة كذا وأنتِ ستايلك ذاك ،
أنهبلت ، بغيت أرسل عليهم فايروس وش هالخنبقة عاد 22ص
ولا مرة لقيت وحدة تسأل تقول وش احسن عطور للجامعة , أوك حلو تسأل عن العطور ووش العطور الزينة بس أحسن عطور للجامعة ؟ وش ذي جديدة , بعدين على خبري العطور بذات ذوق مهوب أحلا وأحسن =/ ،
ولا موضوع الجامعة ياعل قلبي علاه =""( , أجل وش أحسن تنورة ؟ التنورة الي فيها كسرات راحت موضتها يابنات ولا لأ ؟ طيب أنا مررررررا عاجبتني بس أخاف راحت موضتها =""(
لا جد ضاق صدري وش هالحزن خخ ؟ امر الله من سعة والله كل السالفة هياط ولا أحد مدقق لهالدرجة عاد تنورة ؟ ولا فيها كسرة ولا لأ ؟ فاضيتن لتس أنا بأعض شليلي وبأهج للمحاضرة والله العظيم ،
ولا مواضيع الستايلات الي يجيبون صورة وحدة ويعلقون على ستايلها وهذا وذاك , صدز حريم قسم بالله مايخلون المناقد هههههههههههههههههه ،
يمكن هو قسم شادين البنات حيلهم فيه وموب يقصرون من ناحية الأسئلة وزي كذا , بس مانجحف بالمقابل إن السخافة فيه متفشية ،
عاد أزيدتس من الشعر بيت من سجلت بالإقلاع لين الحين مادخلت إلا 5 مرات يمكن 4 مرات أسأل و الـ 5 يومي أدور هكا النوبة وطلعت وأنا أتمنى إني ولد خخ ,

القانون نفسه له قانون ، والقانون مستثنى منه أشياء ممكن تكون خطأ لكنها تعتبر قانونية .
المغفل مأخوذة من فعل " غَفَلَ " وغفل يغفلُ غفلاً فهو مُغْفَلٌ مُغْفِلٌ وفي غفلة ، وعطيني وحدة > تدق رقبة
وغفل عن الشيء بمعنى ما انتبه له ، وهذا المقصود بالعبارة بتعبيرها الأمثل والأصح ،
لكن الناس أحيانًا تحرف المعاني لانها تهمل الحركات ,
ترا غَدِير ، غير غِدِّير .
لو أقولك مُغَفَل ، و مُغْفَل ، فيه فرق الأولى بمعنى الغباء والثانية بمعنى غفل وتعتبر فعل مبني للمجهول .
القانون لايحمي المُغفَلِين فعلاً ، لآنهم أغفلوا أشياء وبعدها جاؤوا يطالبون بحقهم قانونيًا ،
تخيلي شخصين واحد صاحب أملاك وواحد داخل على طمع ،
أبو الأملاك ذا وثق في أبو طمع لدرجة عجيبة ، ومع الوقت جا ابو طمع وقاله أبيك توقع لي هالأوراق , ابو أملاك ذا من قو الثقة ماقرا الي يبي يوقعه وبالأخير طلعت ورقة تسليم أملاك ,
أنا وقتها كمتلقية بأحكم على المسألة قانونيًا فقط بغض النظر عن ظروفها ، جاني أبو أملاك يشكي وقتها بقوله السالفة قانونيًا صحيحة ولا بيدي شيء ، العقد موجود فيه توقيعك وتاريخ وأنت موقع عليه ، وقتها ممكن أقول القانون لا يحمي المُغفلِين فعلاً .
أيضًا لما يجي أحد ويتفق مع واحد على أساس يشتري له حاجة ، وهذي شفتها بحياتي كثير .
ويعطيه مبلغ وقدره ، بدون عقد ، بدون شهود ، بدون ورقة حتى متفق عليها ، ويجي ذاك ويسحب على أمين فلوسه ، طيب لما تجي تبلغ أو تتظلم بيقول عطني دليلك ، عطني شيء يثبت إنك معطيه فعلاً ، لآن الطرف الأخر بينكر السالفة أكيد ، ووقتها تتعلق الدعوة ويحكم قانونيا للشخص الي له الحق الأكبر أو الدليل الأكبر
ممكن وقتها أنا ألقى لي ثغرة في المسألة ، لكن الحق ماراح يرجع كامل ، لآنك أغفلت قانونية المسألة .

حتى القرآن دائمًا يذكر الشهود ، لعظم المسألة ، ولآن الله يعرف إنه بتكون فيه مشاكل مثل كذا , أكد على هالأمر ، لآن السالفة فيها ضياع حق بشكل كبير لطرف واحد من الأثنين , وكلامي هذا يفسر سطري الأول من الجواب ، والشهود موب لازم أوادم ، أي شيء بسيط ممكن يقلب موازين القضية .

فيه أشياء كثيرة تقدرين تطلعين حقك بها بس الدعوة يبيلها ذكاء ، مشكلتنا ما أستخدمنا التقنية بالقانون ، ولا لو هذا الشخص قبل لايعطيه الفلوس سجله صوتي بجواله هذا بحد ذاته يكفي .

-

سؤال كبير ، كبير لدرجة أني ما أحس أني قلت الي أبيه جد ،
هالحين جد ورا كلامي غادي تسذا من تالي ؟ يع أحسني مسألة رياضيات عيت تنحل ،
ياربيه صاير كثير على غير سنع ومهوب مرتب ولازق =/

أهم شيء إن السؤال مكرر مرتين ، كل ذا عزيمة عشان أجاوب خخ ؟
فيني ملل لدرجة ودي أطقها رجلية لإنجلترا ق1 =/ ,

+ جازت لأميني أجوبة بعض الناس على سؤالك > تبشرينه هالحين ؟
+ مشكلتي ما أعرف أسفه الأسئلة أبداً حتى لو كانت جماعية =/ ؛

صباح الموب إحتياج .. أو صباح إحتياج لله ق1 .


قلتِ لي النقد ض1 ؟ النقد فن .. وفن كبير جداً ، هو إنك تعرف مساوئ الشيء قبل لاتشرع فيه ، وتعرف مساوئ مساوئ الشيء , وتعرف تصحيح المساوئ ، وتعرف الصحيح من المساوئ , كل هذا بوقت واحد .
والي يضبط النقد السليم بحذافيرة ، هذا أعتبر عنده ملكية إلهية .

النقد بوجهة نظري إن له سلبية وحدة , إذا كان نقد لاذع , أو كان النقد مُصاغ بطريقة خطأ من ناحية الألفاظ .
حنا نتوقع إن النقد شيء ضخم وكبير ، وإن سلبياته كثير , لكن فعلاً المشكلة ماهي بالنقد بحد ذاته , المشكلة فينا كأفراد , حنا مانتقبل النقد , وهذه طبيعة بشرية ، لأننا مولعين بالكمال , ولأننا نحاول نوصل للكمال في عين أنفسنا أولاً , ولما نوصل لهالمرحلة إننا نكون كاملين بعين أنفسنا ، ننقهر لما يجي أحد وينقدنا ،
قد قلتها مرة , قد تكون المشكلة محصورة في المتلقي , أحياناً لو كان أسلوبك ينقط عسل هذا مايشفع للمتلقي ولا راح يتقبل كلامك لآنه يندرج تحت باب النقد ، وهو مايتقبل النقد , وهنا مشكلة .
وأحياناً الإنسان المتلقي يقدر ياخذ مفهوم النقد الموجه له بعض النظر عن الإسلوب الي إنقال النقد فيه ، سواء لاذع أو موب لاذع , هو مايهمه الإسلوب بقد مايهمه فكرة النقد الي راح تصل .
فالنقد يختلف بإختلاف الأفراد ومفهومهم عن النقد وشخصياتهم ، بعض الناس يشوفون النقد قلة أدب , وبعضهم يحرصون عليهم لآنه يصحح مسارهم , وبعضهم طرف محايد , مايبحث عن النقد بنفسه لكن يتقبله .

ناوية تخليني أفتح الفورم ولا وش خخ ؟

هههههههههههههههههههههههههههههههههههه هيضتني مفردة في هالسؤال ولعيونها بجاوب ض1ق1

أولا الملكية الفكرية مصطلح يُعرف نفسه ، وهي حماية الأفكار وعدم سرقتها بشكل عام .
لكن فيه مقياس للأفكار , فيه أفكار تُقتبس , وأفكار تُسرق , الأفكار الي تقتبس هذي غالباً تكون موجودة عند الناس , وهي الي نسميها " تشابه الأفكار " , ممكن أنا أقولك جملة وكانت فعلاً تجول بخاطرك بس ماعرفتِ كيف تطلعينها , وتروحين وتقتبسينها عند أي نقاش يواجهك , هذا مايتعبر ملكة فكرية وهذا بعيد كل البعد عنها ،
أما الأفكار الي تسرق , فيه غالباً تكون في الإختراعات , والتأليف ، لأن الفكرة هنا أختل فيها شرط الأفكار الي تقتبس , وهي إنها ماتكون متواجدة عند الناس , ليه المخترعين ياخذون براءة إختراع ؟ وليه المؤلفين تكون لهم حقوق فكرية ؟ لحمايتهم أولاً ولا يجيك واحد مخه بركبته وياخذ نفس الفكرة ويسوي لي إختراع اللهم مغير فيه كم حاجة لكن الفكرة الأساسية موجودة , ويقول أنا الي مسويه قبل هذا .. ونفس الشيء في الكتب .

حقوقها مثل حقوق أي شيء بالحياة ، لا يُسرق ، ولا حتى يُقتبس إلا بالإذن ، ولا يُقلد , ولا يُنسب لشخص ماهو مستحق إنه ينتسب له الشيء , مثل شركة بتسوق إختراع وطبعاً لازم يكون فيه مسوقين , ماينفع يجي المسوق ويقول " هذا الأختراع إختراع كيت وكيت " أو يقول إختراع شركتنا , تخسى وتهبى وين شركتك معه > شاتت اللاب في هالفقرة , شركتك ماسوت شيء , ولولا صاحب فكرة الإختراع ماتسوق المنتج , فشركتك ماسوت شيء عشان ينتسب لها الفضل .

يارب عيوني تلمع وأنا أجاوب السؤال .. تتوقعين ليه ض1 ؟

المشاكل بشكل عام إذا وضعت بإطار السخرية يسقط حقها بالحل ،
لأن الأسلوب الساخر يتميز بالمبالغات " الشاطحة " عشان كذا أُطلق عليه كوميديا ،
ولأن المبالغات ماتخش العقل بشكل عام فيستحيل الوصول لحل ، لأن المشكلة ماهي بحجمها الطبيعي لتُحل بحلها الطبيعي ,
مثل لما أجيب بلونة كبيرة وأتفخها بغرفتك ، وأقولك غرفتك فيها مشكلة حليها ،
هو انتِ تشوفين شيء من البلونة الي لو أنفجرت طيرتني لموزمبيق عشان تحلين المشكلة ؟
ليه دايمًا نردد " قل الشيء بدون مبالغة " , ؟

عمومًا الأسلوب الساخر حتى بالأدب يتميز بإنه يطرح المشكلة أو الظاهرة وماتكون غايته الحل ، بقدر ماتكون غايته الإضحاك ، وهذا شيء معروف من حين الأدب .
وبات مشهور إن الأدب الساخر ينتقد فقط ولا يحل ، مثله مثل مسجل خربان جالس يتكلم ويتكلم إلى مالانهاية .

من ناحية الظواهر الإجتماعية , فأقولك الظواهر الإجتماعية لا تُحل ، وإنما تُخفف ، وهذي نظرية من نظريات علم الإجتماع , وتخفيفها على حسب الفرد الي تتعاملين معه , هو يتقبل ولا مايتقبل ؟ لما يجيك واحد فيه حرارة بياخذ علاج الحرارة وبيطيب عقب ربع ساعة ؟ شيء ماهو عقلي ، بتبدأ الحرارة تخف تخف تخف إلى أن تروح , لكن أما إنها تخف ويروح عمنا يشرب بارد ولا ياكل ثلج ويقول بطيب ؟ ماينفع كذا , نفس الحكاية بالنسبة للمجتمع ، والمجتمع حل مشاكله شيء صعب جداً ، الحين بعض الأفراد وتتعسرين في تغيير مفاهيمه فكيف بمجتمع فيه كل الطبقات , الفاهم والعاقل والساخر والجاد والهازل والي يستحي والي مايستحي ؟
أيضاً لنفرض مسكنا واحد بنعالج المفهوم القبلي الخاطئ الي فيه , وفرضًا تعالج , هل أنا بأضمن علاج أهله ؟ هل أنا بأضمن إن أهله ماينكسونه ؟ هل أنا وهو بنضمن ردة فعل اهله ؟ بعض الأشياء نسويها من غير قناعة عشان بس نسكت الكلام الي يدور حولنا ,
وعموماً المجتمع والإنسان ماياخذ إلا الي يبيه هو , ولو إننا فعلاً نطبق السنة كان جعلنا القبلية شيء كخ ولا إلتفتنا لها ، لكننا مجتمع ياخذ الي يريحه حتى ولو كان خطأ , ومدامنا وصلنا لهالمرحلة صعبة نرجع , يالله بجيل جديد يجي عقب جيلنا يكون مجرد من هالأفكار ، لكن ماتضمنين أيضًا ربما الأفكار تنزرع ، ولذلك إنتِ ماتضمنين زوال الأفكار نهائياً أبداً ، فضلاً عن ذلك قبل لانحل مشكلة لازم نعرف السبب الرئيسي لها , ولما نحل مسببها الرئيسي بتتلاشى المشكلة , وحنا في أغلب مشاكل المجتمع , مانعرف أسبابها .

المشكلة صارت أكبر من عادات وتقاليد .. في كل شيء , أحس هاللفظة صارت شماعة لكل شيء خطأ يفعله أحد .

ماهان علي أسفه السؤال .. وردي لايعني إني رجعت ض1 .

نفسي تسول لي أرجع أقفل الفورم ،
وتسول لي بقوة ..
إفتتاحه كان غلطة من الأساس =/ ,

لذلك إلي عندها شيء تقولي المجال مفتوح إلى اليوم ،
وأحب أوضح مع إني مدري وش الي حادني أوضح ..
تراي ماقفلته عشان أحد ، لأني مافتحته عشان أحد .
ومابي تسوون لي لطمية في الإنبوكس ،
+ معليش على الأسئلة الي جاها ركبه عميقة .

أول مرة تشوفوني أرد بدون خلق 22ص ؟